Avant intginas emnas hai jau deplorablamain stuì far la constataziun ch’jau sun para ina persuna dal tuttafatg superfiziala. Quai suenter ina visita en il lieu nua ch’jau sun creschida si. Adatg, quai n’è betg in vitg en las muntognas grischunas, mabain insanua en la vastadad rurala da la planira da la Linth.
Jau sun pia stada en quest vitg (che fiss atgnamain gugent ina citad ma è quai mo pervia da ses dretg da martgà istoric) sin ina plazza da gieu cun mias figlias. Quest fatg fiss en sasez gia traumatic avunda, lev’jau gea sco giuvna atgnamain mo vegnir davent da quest lieu. Ma i n’era atgnamain gnanc uschè mal.
Fin che las autras mammas (nagins babs) èn arrivadas. Ussa: tgi che manegia che questas dunnas hajan fatg nauschas remartgas envers mai, vegn dischillus. I va en questa columna per mes caracter malizius, e betg per quel dad autra glieud. Na, ellas èn stadas tut flottas ed ils discurs han sumeglià a quels da la plazza da gieu a Turitg: „Ah, ihr redet romanisch? So e schöni Sprach, mega wichtig dasses erhalte bliibt.“ Be la remartga obligatorica tar l’abitaziun da vacanzas ch’els possedian qua si mancava.
Tuttina hai jau sentì in daletg cura ch‘jau sun sortida la saira or dal tren al Stadelhofen a Turitg. Betg perquai ch’jau ma sent talmain a chasa al Stadelhofen, u perquai ch’jau hai vesì il lai da Turitg. Na, la raschun è anc bler main simpatica. Jau sun gugent en citad, perquai ch‘i ma plascha meglier co che la glieud sa vestgescha là.
Jau hai realisà ch’i dat in dresscode en ils vitgs rurals. E per il solit ed en il meglier cas è quai in dresscode senza stil (jau ditg mo: Funktionskleidung). Tar l’unifurma tutgan skinny-jeans en cumbinaziun cun chalzers da trekking, ina giacca oranscha ni da colur da burgund che resista a vent e plievgia. Ah, ed jau hai emblidà la frisura obligatorica cun mèches blondas.
Quant auter èsi a Turitg! Betg che tutta glieud avess stil qua (sur dals divers faceliftings e botox scrivel jau lura en in‘autra columna), ma igl è simplamain grondiusamain divers. Egal tge che ti portas, x-insatgi porta segir anc insatge pli balurd. I dat outfits che pudessan vegni mussads sin il catwalk a Milano, da quels che paran da vegnir dal set da Pirates of the Carribean e da quels che tutgan probabel plitost en in club da BDSM (era senza Streetparade). E natiralmain datti era qua la vestgadira da funcziun. Ma halt betg MO.
Jau sai. Gust è relativ. Ma stil eba betg. Ed jau hai gugent glieud cun stil. Ma tuttina hai jau la saira sissu traplà mamezza co ch’jau hai googlà ils chalzers da trekking dad ina da las mammas sin la plazza da gieu. Quels avevan numnadamain schon coga stil. Tgi sa sche mèches stessan a mi?