Ina amia da mai enconuscha ina gruppa da dunnas che s’entaupa (tut correspundent al clisché) mintg’emna sin in cüpli ni in glas vin alv e bagliaffan e tschantscherleschan sur da lur uffants ed umens (sur dals ultims cun preferenza). Cura ch’jau hai udì quai l’emprima giada hai jau ris e numnà ellas sco pitschna reminiscenza a la seria da TV las desperate houswives.
In suentermezdi m’ha mia amia prendì cun ad ina da quellas sentupadas. Jau sun vegnida beneventada cordialmain cun bitschs e brancladas, mia figlia L. è vegnida numnada gnocca (suenter ch’igl è vegnì sclerì sch’ella saja in buob u ina buoba) ed ins m’ha smatgà enta maun in magiel cun prosecco ch’jau hai acceptà tut grata. Nus essan sesidas enturn l’insla-cuschina ed essan ans tegnidas vi dals monis da noss magiels fertant ch’ils uffants han cumenzà a prender dapart l’abitaziun.
Adina puspè ha ina da nus (umens n’eran betg preschents) stuì siglir si per separar dus cots u per stgarpar ord maun in guaffen mortal ad in poppin. Tranteren hai jau intervegnì che l’um da la mamma cun ils chavels blonds ha reservà duas stanzas per las vacanzas da famiglia: ina per el ed ina per ella cun ils dus uffants – il medem dal reminent en l’eroplan: in sez per el ed in per retschas plinavant in sez per ella e dus per ils uffants. Jau sun vegnida a savair che la mamma da la mamma cun ils trais uffants vegn mintgatant a pertgirar ils uffants, ma che lezza laschia mintgamai enavos l’abitaziun en in caos. E che la mamma che lavura en ina partiziun da persunal ha ina emploiada ch’è dal maini che ses job saja talmain lungurus ch’el pudess era vegnir fatg dad «x-ina mamma».
Il maletg ch’jau aveva dad ellas era spert sa confirmà: Las desperate housewives che avevan pli baud siemis ed ideas en colurs pastell ed èn lura vegnidas tschiffadas da la trida realitad. Mammas che prendan pirlas u baivan alcohol per supportar lur rolla n’èn gea betg pir dapi Mothers little helper dals Rolling Stones in fenomen enconuschent. Gia els onns 50 vegniva vendì in med fortifitgant cun il num Frauengold, ch’era da retrair senza recept en drogarias ed apotecas. Substanza activa principala era alcohol: 16,5 pertschient en volumen. In success da vendita fin a ses scumond 1981.
Lez suentermezdi n’era betg la davosa giada ch’jau sun stada da la partida. I ha dà cüplis en curtin, sin balcun, sin plazza da gieu. Ins sto savair ch’igl è simplamain stoda lungurus da pertgirar uffants tut sulet e che quai è simplamain bler pli leger sch’ins ha in pau cumpagnia ed in u dus glas vin intus. Ma tuttina hai jau surrì in pau da quellas dunnas, fin in di en la badi. Là ha la mamma cun ils chavels curts prendì nauadora ina buttiglia ed ha studegià dad aut sch’ella duess ussa avrir quella u betg. Lura ha ella guardà sin mai e ditg «Ah, tge studegel jau, la Viola è gea quà!» ed ha laschà schluppegiar il cucun.
En quest mument hai jau realisà che las desperate housewives avevan magari il medem maletg da mai sco jau dad ellas. Ed jau hai stuì admetter che quellas dunnas n’èn forsa gnanc uschè desperadas – almain betg pli desperadas che jau.