Ch’insatge è insaco auter hai jau remartgà avant in per emnas durant ina sesida da zoom. Nus eran vi dal discutar ideas per in project e suenter in temp s’ha mes visavis envidà tut casual ina cigaretta. Jau al hai observà ed en mes chau è tuttenina cumparì in Oh!. Pia in Oh! en scrittira cursiva. E durant las suandantas minutas n’hai jau mo anc pudì ma concentrar sin la moda co ch’el tegneva la cigaretta tranter dus dets e co ch’ella pendeva vi da sies lefs cura ch’el aveva da tippar insatge sin ses laptop.
Tge diavel?, hai jau pensà. Quai na duess ussa toch simplamain betg esser uschè hot, ni?! Tge va fauss cun mai? Jau na sun betg pli in gizzischem teenie da 16 onns che stat sin badboys, jau hai 32 onns, sun mamma da dus uffants e stun cun omadus pes en vita. E tuttina ses’jau durant in zoom-call tuttenina là cun puls aut e vistas cotschnas mo perquai che mes visavis s’ha envidà ina cigaretta? Okay, to be fair, il accent englais n’ha era betg grad gidà… Jau sun simplamain anglofila. Ma please. Igl è tuttina simplamain penibel.
La saira suenter il zoom, cura ch’ils uffants eran a letg s’ha mes partenari bittà en las chautschas da velo per far sia obligata runda sin il trainer da rollas. E sorry, jau sai, i na dat atgnamain nagut main sexy che chautschas da velo, ma immediat era el puspè là, il Oh! en scrittira cursiva. Are you kidding me? Betg da crair. Jau seseva pia sin il sofa ed hai empruvà da ma concentrar sin mes cudesch fin che mes char aveva finalmain terminà sia ura da trenament. Jau hai anc lubì ad el dad ir a far la duscha, ma lura eri propi nairas uras …
La notg sun jau lura vegnida nanavant pervia dad ina stoda stratgada a la vart dretga da mia batschida. In curt sguard sin il chalender, e tuttenina ha tut fatg senn. L’ov è siglì. Jau sun entamez il ciclus, mes dis fritgaivels, e mes corp ha evidentamain il sentiment ch’i saja temp da puspè far in pop. Seriously? Sch’jau avess suenter mias quaidas sin badboys cun cigarettas anc duvrà in ulteriur mussament per il fatg che mes corp na sa evidentamain betg tge ch’è bun per mai, lura fiss quai stà la cumprova.
Jau na sai betg sch’i ha da far cun la vegliadetgna, cun il corp che sa mida, ni cun l’experientscha che crescha, ma durant las emnas suandantas hai jau adina puspè remartgà tge influenza ch’il ciclus para tuttenina dad avair sin mai. Pli baud n’era quai toch betg uschia? Ni n’hai jau simplamain betg remartgà? Jau aveva fin ussa adina il sentiment ch’il discurs sur da las lunas e l’influenza dal ciclus saja surfatg.
Cler, era jau aveva mintgatant mal durant la perioda e lura nauscha luna, ma sentir l’ovulaziun? Sa sentir durant tscherts dis total down e durant tscherts dis plain energia e quai pervia dal ciclus? Quai n’enconuschev’jau fin ussa simplamain betg da mai. E tuttina eri era in pau quietant da vesair che la cigaretta en bucca da mes visavis durant la sesida in’emna pli tard n’aveva betg approximativamain il medem effect sin mai. Ed insaco era in pau trist.
Cura ch’i gieva pia per far giu il proxim termin da zoomar hai jau pensà vi dal Oh! cursiv en mes chau e proponì in termin en trais emnas. In gliendesdi. Quai è numnadamain il di nua che mes char fa per il solit ses trenament da velo la saira. Perquai ch’ins n’è mai memia vegl per emprender tschertas chaussas sur da sasezza e ses corp.